講章:論靈修(太廿三)

你們這假冒為善的文士和法利賽人有禍了!因為你們正當人前,把天國的門關了,自己不進去,正要進去的人,你們也不容他們進去。太廿三13

我有一個表妹,讀中二的,正正常常的中學生,當然會正正常常咁,鍾意人啦。事情係點既呢。我求其幫個男仔改個名啦,叫 Tommy 啦,Tommy 呢,就係打籃球既。你知啦,打籃球既男仔通常係點架?臭丫嘛。而我表妹呢,就坐響佢格離,一直都好憎佢,因為佢每次小息、lunch打完波返來,都相當之臭,令佢上堂經常要想方法癖味。例如係用蘋果味紙巾遮鼻呀,叫佢坐開D呀,叫班長開冷氣呀咁。但係,青春期的男仔,實在係太臭,佢完全忍受唔到。莫講話傾計,我表妹連面向住佢都唔肯。

有無人想知後來點樣?

有一次,阿 Tommy 打比賽果時跌斷左隻手,入左一排醫院,之後就打石膏。 Tommy 不在的時候,我表妹終於覺得課室的空氣好清新,好似,去左北海道既薰衣草田一樣。之後 Tommy 返左黎,由於佢無得打波,佢無咁臭,個人都乾爽左。又由於 Tommy 忽然 disable,表妹要幫手照顧佢,佢地於是開始左講野。原來,除了臭之外,Tommy 個人係無咩野既,數學同運動都好,同埋原來佢無波打的時候,個人都幾姿整,佢D髮泥味都 ok 好聞。

不用說,在這段期間,他們就慢慢又互不相識,開始傾計。由上堂的幾句交談,慢慢變成放學後send message;由河水不犯井水的筆袋,變成撈亂筆用;Tommy 教表妹數,表妹幫 Tommy 印 notes。後來, Tommy 拆了石膏,又開始回到球壇。奇怪的,是表妹再唔覺得 Tommy 好難聞。而係係佢身上,散發一種「愛情的氣味」(法文:parfum  de l’amour)。表妹就是大概在這個時候告訴我她鍾意左 Tommy 而不知怎辦的。

你地想唔想知故事繼續下去怎樣?好,我會講的,但等我講下道先。我來,是講道的。

拿,你係咪好想我講落去呢?係咪好想要知道件事後尾點呢?記住呢種羅羅攣的感覺,今日,我就係要講呢種感覺!呢D,叫好奇心。好好記住。如果你唔明,或者你唔想知,我再給你們一個機會:

中國人、日本人、英國人、美國人一塊喝酒…喝醉了幾個人無聊美國人說:”我有個注意,咱們比槍法吧!”大家說:”怎麼個比法,美國人說:”讓一個人頭上頂一個蘋果” 日本人槍法不好說但又不好意思說”為了證明自己膽大說:”我來頂”

美國人先打把蘋果打碎了.美國人吹了吹槍上煙說”I am Bond, James Bond.”
到英國人了英國人也把蘋果打碎了 英國人輕蔑的一笑說 “I am Robin Hood.”

到中國人了 中國人哆哆嗦嗦 一槍把小日本給斃了 中國人笑的說「■■■■■■■■■■」

好奇心,就係你等一個 IQ 題開估的心情,就係你想知道故事點樣發展的那種心情,就係你好想知道個中國人講左D咩既那份 passion!

個中國人話:I am sorry.

好,我真係要講道勒。我今日係要講,乜野係靈修。

靈修呀。

靈修,係咩?

你可以話俾我知,一次靈修呢,就係選擇一個時段,先安靜,然後打開靈修書,或者聖經,睇,然後諗下有咩得著,然後祈禱,求神幫助你,然後又可以為人禱告。呢D,就係靈修勒。no no no,唔係咁。你咁樣無答到我,你只係話俾我知怎樣靈修,係一個 How to 的問題,而不是 What 的問題。即係我問你,咩係乾炒牛河,你唔以就咁答我係搵D乾黎炒牛河架嘛。不過大家放心,我唔係專登出條題目來為難大家的,你要知道,靈修,博大精深,深奧可以讀一個博士學位回來,要三言兩語講,一係,你好膚淺,一係,你好有勇氣。而我,係又膚淺,又有勇氣。所以,我今日,真係會同大家講下咩係靈修。

大家知道,我係____的同班、係____的師兄,所以,我都係讀____的。_____,係一間好講靈修的神學院,有一次,有個高人來指點我地咩係靈修,佢講左一句:「靈修,就係求『呀~』個一下。」我聽完佢講,我自己都當堂「呀~」左一聲,心諗,你講咩呀?後來,我繼續思索高人呢一番高話,我開始有所領悟。原來,果一下「呀~」,係代表你人生突然有所領悟。ok? 領悟D咩呢,呢一道我要講得抽象少少。

很多教會會鼓勵信徒靈修,和互相靈修分享。我話你知,我大大話話信主十幾年,聽過無數的靈修分享,有 80% 係咁樣既:「我覺得我信心唔夠,求主幫助」「神真係好愛我地,所以我地要好好愛神」「原來人真係好軟弱,我地真係要依靠神」「教會係一個罪人的群體,我地要互相包容」咁分享,有咩問題呢。細看之下,好好丫,有反省,有得著,有心意更新而變化,係咪?問題,唔係無得著,而係,靈修,並不是關於「我們要怎樣做」,而是關於「我.是.誰」。

靈修,其實只係關乎一件事,就係一個人不斷 search 自己的內心,覺得自己失敗、錯折、唔夠愛、無信心,然後,發現即使係咁,神愛我。而我唔係講緊頭腦上知道神愛我,而係,從心裡面「呀~」一聲,知道神愛我。靈修呢一下「呀~」,係相當寶貴的。當基督徒看錯靈修,將靈修視為責任、修練、工序,就會唔記得,其實,靈修是為了要親近神,而親近神,無非就是從心裡面感受到神愛我。所以,再囉唆地講,靈修唔係去獲得一D資訊、一D信徒生活tips,而係去感受神既愛。靈修,係好後現代,講 feel的。

所以,你依家係咪好似明,但係又唔知明左D咩咁呢?我會繼續講。好了,不如我地投一下票先,你地想我講靈修,定係講表妹件事先?(vote)

既然你地想我講表妹,咁我又叫你們投票,咁我講啦。上回講到,表妹已經唔覺得 Tommy 臭,而係聞到 parfum  de l’amour,即係話,表妹已經深深沉左船,那時是十二月。十二月,聖誕臨近,他們班在 24 號晚搞左個 party。其實所謂 party,是很流的。一班十幾個比較  friend 的同學,去其中一個 friend 家,叫些到會,幾個去打麻將、幾個打 winning、一兩個去個 friend 間房睇佢 D 漫畫,有D情侶就會密密斟,或者耍下花槍。其他果D就戇居居,呢度玩下,果度玩下。不過,唔緊要,開 party,係講feel  既,好似靈修咁。

Tommy 和表妹果時已經幾熟,熟到他們會被同學「造」。即係好老套果D叫佢地一齊坐呀,又叫佢地 share 一條腸呀,又玩遊戲焗佢地一組呀,你明啦。其實我表妹係幾尷尬的,因為佢都唔知 Tommy 點諗,萬一太 over,就唔好啦。相反, Tommy 又幾大放喎,除左唔肯在遊戲時拖表妹隻手之外,其他佢都好易就範。所以,表妹同我講,話佢覺得 Tommy 其實OK佢的。之後,佢地都係咁啦,成日 sms,又約出去一齊溫書又盛。

佢地學校呢,係放完聖誕考試的。開學返多一兩日,就開考。返學第一日,Tommy 約左我表妹放學去 tea,話有野問佢。表妹果日完全無心機上堂,好想快D放學,好想知道 Tommy 係咪今日表白。你知啦,聖誕過後拍拖,就新年、情人節、白色情人節、清明、端午一路直落架啦嘛,好爽架。佢咁大個女係第一次差少少就拍到拖,佢簡直想立刻打八號風球,然後宣佈放學,然後等 Tommy 表白。

好勒,放左學勒。佢地由於被「造」得太勁,所以無一齊走。佢地約左係一間比較遠的 pacific coffee 等。好勒,咖啡買左,閒話講完,Tommy 終於入正題勒。你估下佢問咩?我梗係唔依家講啦。好,繼續講道!

靈修,就是為了一聲「呀~」,深深體會神的愛,其他一切的訓晦、引導、提醒,是次要的。而你要明白一點,當神的愛是最重要的時候,其他一切次等 的東西,就成為最好的敵人。You know what I mean? the enemy of the BEST is the second best. 但我們有很多時代,就是在靈修的時候,拿到一點點東西,就以為可以完成任務,心裡平安,其實唔係咁的。靈修,似一次向下掘寶物的經驗。在我們心靈的底層,有一份寶物,就是神對我們的愛。我們每一次靈修,就是去發掘這個寶藏。但我們很多時都沒有以挖寶的心情去靈修,反而是似一個無聊的礦工,總之挖到些東西,就收工走人了。這樣,不是靈修。

靈修,要挖到寶,必須要有好奇心。ok,你現在知道甚麼是好奇心了。好奇心,就是你好想知究竟 Tommy 點同表妹表白,佢地最後有無係埋一齊。我入正題了。

好奇心,讓我們繼續去問「點解」「點解」,當我們對上帝有好奇心,哈,你的靈命是一定會進步的。因為,好奇心讓我們思考,讓我們問問題,也讓我們有動力去找答案。但更重要的是,好奇心能夠對抗麻木。甚麼叫麻木呢?就是你去做一件事,而你又唔覺得果件事有意義,咁就係麻木勒。例如,讀書。例如,打 online game。例如,睇電視。例如,返教會。

係呀!返教會,可以係麻木的。只要你長年累月,只係聽過人講你一定要返,而你自己無諗過點解要返,呢D唔係麻木,係咩呀?當有人問你,點解要返教會,而你答唔出一個你自己覺得從心而發既答覆,呢D,就係麻木。當人質疑你浪費時候,而你只係話到俾佢聽「你們不可停止聚會」,咁信法,人地就會覺得你係麻木。

同樣道理,呢個世界,咩都可以係麻木的。你唔知為咩要推銀、收冬菇、起餐廳、養人仔。你只係覺得悶的話,呢D,就係麻木。當你一頁一頁揭寶島少年,一頁一頁睇海賊王,你唔知自己點解要追落去,呢D,就係麻木。當你開住facebook,漫無目的的「碌」落去,睇完又睇,不斷洗 like,呢D,就係麻木。當你打開課本,生吞活剝,強記書傳,唔知為乜,呢D,就係麻木。咁,你即係叫我唔好睇 facebook、唔好睇漫畫、唔好收菇、甚至,唔好返教會嗟?唔係!我絕對唔係咁既意思。我係要你諗下,究竟,你做每件事為左乜!

當你打開寶島少年,你諗下自己做緊咩,諗下今期海賊王有咩感動位,呢D,就唔係麻木,相反,呢D,就係靈修。當你打開面書,看著每一個朋友,你對他的生命多一點好奇,多一點關心,呢D,就唔係麻木。當你坐在崇拜的此時、此刻,你問下自己,你係度,有咩意思,你諗得通,呢D,就唔係麻木。

當你每事都好奇,去問,去諗多一點的時候,不但你去脫離麻木,而且,萬事皆可以是靈修。我告訴你一個片段,大家有沒有有睇火影,單行本 60?有無人未睇?我會劇透,如果你唔想聽到劇透,唔該你出出去,等陣我叫人叫番你入來。我睇火影,係有靈修的。

單行本第 60,叫《九喇嘛》,咩係九喇嘛呢?我必須要向無睇過火影的朋友講解一下。火影忍者的主角鳴門,體內有一隻九尾妖狐,能力相當大,但也相當邪惡,令鳴門一生受到折磨。故事去到中段,他們的關係開始沒那麼緊張,鳴門和九尾開始有非常少的合作,但九尾還是不信任鳴門。九喇嘛,就是九尾狐的名字,鳴門一直都不知道牠有名字,當鳴門叫牠真名的時候,他們的關係就有了轉化,九喇嘛的心結就解開。你明唔明個靈修位係邊呀?係一個人的名字,對一個人來說是相當重要的。你可以一直知道一個人,但不懂得叫他的名字,但唯有一個人被別人叫他的名字的時候,他才真正的和對方有關係。你知道聖經有類似的故事嗎?有的!就是耶穌復活後,馬利亞去找耶穌的空墳墓,直到耶穌呼喚她名字的時候,她才醒覺。you know? 名字,是相當重要的。就是從漫畫中看到這樣的道理。你們只要肯多點好奇心,多點想像力,就身邊萬事萬物都有可以好奇的地方,給你思想,給你反省的機會。

好,我好像講得太遠,我們回到我們日常的靈修,我雖然認為萬事萬物都可以靈修,但我認為大家若未扎好馬步,就搞呢D野,是好易走火入魔的。你要好似我咁,熟D聖經,成好搞呢D野。所以,我最後教返大家,點樣用靈修書靈修得來,又不會因循,跌入麻木的陷阱。其實只是一道心法,就夠。

問「點解」。

靈修唔係做閱讀理解,唔係要判別奪命四式,問點解,就係將固有的答案顛覆,去思考另一個可以性。留意,我唔解教你去「反」,我絕對唔係教你去反,我係想你明白,問點解背後,就是一個探索。而且過程中,一定要自問自答,自己想出來的問題,自己諗解答。答完,又繼續追問下去,一層一層咁,好似剝洋蔥咁。人家說,剝洋蔥到最尾就是甚麼也沒有,我告訴你,不是的。你剖開自己的心,上帝的話就能進入了。上帝的愛,就能進入了。相反,當你一早就被靈修書已定下的答案規範,上帝就不能和你深入對話。情況似D咩呢?

你有一次有機會和奧巴馬會談,你之前就讀左佢本傳記,你覺得你好認識佢啦。去到會談,奧巴馬問你,你有咩想講呀,你話,無咩呀,本書講哂啦,我睇得明呀。結果,大家沒甚麼話說,會談結束。

最後,我諗你地會有疑問,你講左咁多,同頭先一開始讀的經文有咩關係。我地頭先讀太廿三,全章都係耶穌挑戰法利賽人的。他指出法利賽人很多捉錯用神的地方,把上帝都搞錯了。耶穌,也是讀同一本聖經大的,他大概也懂得法利賽的經典,為甚麼耶穌會讀得出和他們不同的意思呢?我想,就是因為耶穌肯問「點解」,用不同的角度看已經被好好解釋了的聖經重新了解,他才會有劃時代的見解,到今日還影響我們。

好,最後,你們想不想知道 Tommy 和表妹的結局?

Tommy 跟表妹說:「我好似鍾意左你個 friend Betty,你可唔可以幫我?」

Advertisements

One thought on “講章:論靈修(太廿三)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s