陳到的崇拜筆記006——中華基督教會鰂魚涌堂

(系列介紹:在下陳到會突襲不同教會的崇拜,寫筆記,作評論。無惡意的,好似係。)

2017/2/26 11:30pm@中華基督教會鰂魚涌堂


前言:我是那天早上因為遲了出門口才去這間教會崇拜的,我不認識他們任何一人,他們也不認識我。

崇拜11:30am開始,我早了15分鐘到。我上去的時候,上一堂崇拜未完,有司事見我生面口,問「你好,你叫咩名?」我回說:「姓陳。」然後隨即叫我填表。我佢絕。司事叫我左在轉角的一排椅上。崇拜前五分鐘,我坐進大堂,忽然,一人從後拍一拍向我問安。我大感冒犯,望一望我的左肩,示意「你做咩掂我呀?」那人離去。

崇拜開始,主席是位儀表端莊的女士,從她的表現我判斷她是讀稿的。注意,讀稿絕非問題,她的語調可以用「平淡」來形容,像開會交待事務。(btw,我是很喜歡這樣的)主席簡單交待之後就轉領詩帶敬拜,三首詩歌,一首係傳統聖詩,兩首係流行詩歌,平平淡淡,無甚可談,表過就好。之後主席領禱,禱文是預先寫的,四平八穩,涵蓋的內容也豐富,是一個很好的禱告,除了一句露了底——「放下一切爭執⋯⋯」我一聽到有人咁祈禱,我就覺得禁聲意味好濃,唔鍾意。然後獻詩,之後就講道。

我想多花點時間講這間教會的講道,因為這環節令我「獲益良多」。我希望詳細d講,所以會長,大家準備好。經文如下:

8 總而言之,你們都要同心,彼此體恤,相愛如弟兄,存慈憐謙卑的心。 9 不以惡報惡,以辱罵還辱罵,倒要祝福;因你們是為此蒙召,好叫你們承受福氣。 10 因為經上說:人若愛生命,願享美福,須要禁止舌頭不出惡言,嘴唇不說詭詐的話; 11 也要離惡行善,尋求和睦,一心追趕。 12 因為,主的眼看顧義人;主的耳聽他們的祈禱。惟有行惡的人,主向他們變臉。 13 你們若是熱心行善,有誰害你們呢? 14 你們就是為義受苦,也是有福的。不要怕人的威嚇(的威嚇:或譯所怕的),也不要驚慌; 15 只要心裡尊主基督為聖。有人問你們心中盼望的緣由,就要常作準備,以溫柔、敬畏的心回答各人; 16 存著無虧的良心,叫你們在何事上被毀謗,就在何事上可以叫那誣賴你們在基督裡有好品行的人自覺羞愧。

 

大綱如下

1. 認清追求和睦的目標 ,放低自我
2. 禁戒口舌的罪,不出惡言
3. 熱心行善,不怕受苦;常作準備,分享盼望

講道可分為四部分,首先是連繫經文和當前現實處境,然後就是放低自我、不出惡言、熱心行善三點了。講員指出鄰舍在現代已經由鄰居變成同事、同學,然後指出經文教我們作好鄰舍。問題來了,經文唔係咁講喎。經文上文係講夫妻既,下文講基督,呢一段係講「你們」,即係教會。而且,講員話「以前的社會係有主人和奴隸,男尊女卑,羅馬人和猶太人有別 blah blah blah…所以都應用到喺我地今日對鄰舍」這顯然有分別。講員並沒有好好解釋經文當時的處境(主僕社會?信徒受迫害?)然後用一個沒有論據的說話,一下子就連上「我們今日要愛鄰舍」。這是將經文平面化,失去了應有的張力。這樣講的危機是會講「大道理」,即係「阿媽係女人」。

然後講員就分三段講,首段是放低自我。佢既講法,就係將經文已經講得好明既道理,加一大堆不同的屬靈術語(spiritual jargons)擴張意思,以下係我當日抄底的:「放低自己、唔好睇低人、謙卑、開放⋯⋯體恤、明白、憐憫、尋求和睦、為義受苦⋯⋯」我抄唔哂,好長架。我一面聽一面不斷問自己「係咪我太挑剔?其實依家出面講道係咪興咁樣?呢d係咪叫解釋得清楚」我無答案。講員後來提到「追求和睦是要以上帝的道作前提」,講了些生活片段作例,就是這樣了。

第二段講不出惡言。我發現,香港的傳道同工,越來越多用以下套語「近年來,香港社會撕裂,人人因為政治立場互相對立……」係呀,一講到同和睦呀、和平呀、不出惡言呀,就會咁開場架喇。當日的講員,亦不例外,而且加上大堆不同的屬靈術語,變成咁:「香港撕裂⋯⋯香港要更多恩典,人因為敵我矛盾,政見不同,就辱罵對方,人鬧我又鬧,破壞和睦,係網上你一言我一語⋯⋯要做好鄰舍就不出惡言。只講祝福人造就人的好話……」大概係咁啦。這段的重點就是三個字——唔好嘈。很少有人在講道解釋撕裂的源頭,也鮮有作出對與錯的判斷,總之,相嗌唔好口,家和萬事興。喂,上面先講完「追求和睦是要以上帝的道作前提」,為上帝的道爭辯,好正常嗟。所以呢,我真係好怕傳道人夾硬要拉少少社會狀態來講,佢地講來講去都係識叫人唔好嘈。

第三段的開頭,是非常impressive的,以下係原句。「我地信耶穌,大多數都只係想攞多啲祝福。」喂,誠實喎。不過當然,佢唔係認同呢個現象啦,佢係想講信主要受苦。然後講員講下去,都係按佢既做法啦,擴充擴充擴充,咁就好似解釋咗嘞。佢講咗一段意思大概係咁:「為義受苦是信徒印記…社會上覺得以惡報惡正常…」我心諗,喂,有無搞錯呀,你咁抹黑人既。我唔介意為咗簡化論述而 stereotpying,問題係你 stereotpye 得唔啱丫嘛。所謂教會外,都有人為義受苦丫;而教會內,都有以惡報惡,甚至以惡報善添啦。講道的末段,佢咁講:「香港是個人化、世俗化的社會,基督教無人buy,被邊緣化⋯⋯叫攻擊基督教的人自慚形穢⋯⋯」喂,又係咁嘞,乜都入哂d「外人」數,你唔諗下點解無人buy基督教既?你唔諗下點解d人攻擊基督教既。我聽到佢咁講,我真係覺得教會不思進取架,又中二病。一臉「世人都不明白我」咁。

講完道,就回應詩,報告,祝福等等,崇拜就結束了。


我講才說,在這篇講道我獲益良多,我係講真架。由這次聽道,我明白了一些事,就係「點樣先唔會講來講去三幅被」。嗱,我真係好明白崇拜裡面咩人都有,要講得所有人都明,係重要的。這點也是我重視的。這次講道三個重點「放低自我、不出惡言、熱心行善」你話係咪好高深?唔係。係咪好難明?唔係。咁喺講道既時候不斷拋屬靈 jargon有咩意思呢?喂,作為講員,或者就咁一個 speaker,書本上講到明既野,就唔我地重複的。我地係負責講字裡行間的東西,係將寫作的世界連繫去我們的世界。如果書信作者的勸勉係 specific 對一班人,我地要解釋點解作者要同當時讀者講d咁既野。而我地(講員)就係要再將其精粹換成對今日生活在此時此地的指引。這也不是說不能解釋名詞,這就要考你和會眾們的默契了。

綜觀而言,事奉人員對崇拜運作相當嫻熟,一切有規有矩有板有眼,沒甚麼好挑剔,也沒給我甚麼印象。講道的部分,我就只聽了這一堂,我也評論過了。

Advertisements

One thought on “陳到的崇拜筆記006——中華基督教會鰂魚涌堂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s